De tant d'amigas
Qu'ai tengut la man
Quant encara me sabon

Quant d'elei an de brigas
De l'amant qu'èri

M'oblidèran bessai
Lei nusas dau passat
Musas encuei
D'una fugida
D'imatges que li fuguèri
Un temps

M'oblidèran tant

Coma sabi pus tròp pereu
Lo tocar banhat
De sa pèu correnta

Fem de seis uelhs
Nòstre mirau
Puei ven lo sòm e
Siam pus ren
Fins qu'au jorn
D'un pareu d'ametlas
Que nos regacha
Embé fisança
Tornam lei mans

Dins l'aiga tèbia

Uèi
Me siáu vestit
Dau perfum de tu
Perfiecha odor
Dau ventre ligat
De l'enveja de tu

Mentre que siáu
Dins lo sòmi
Te vieu encara desvestida
E mei bocas se pican de tu

Ta peu lusiá de mon esquilh
Eriam toei dos
Coma un solet
Eriam tot doç
Assadolats

Ara te senti prefond
Coma s'èri tu
E careçavi
Ton ventre nus

Esquilhaviam
Lisquets
Dins lo ruscle de l'autre
Se siam fonduts
Dins lo muscle unenc

Odor de bèstia
Floreta que me vestisse
Tastariáu ta doçor
Tant e encara
Coma te voliáu

Coma voliáu ton pitre redond
Sur ma cara pelada de fresc

Eriam urós dau temps de la calor

Dansaviam nus
Sus lo còrs banhat
Deis amants passionats
E lo còr tustava

Me gostavi de tu

Lo barrutlaire qu'èri
T'agradava
E me manjaves
Dau retrach
Avans de me
Negar dins lo balanç
De teis possas caudetas
Au perfum
Sauvatge
Que senti uèi

Me siáu negat
Dins lo ren dire

Tres còps lo jorn
Nos fasiam viure
E mancaviam
De vida encara
Coma s'eriam
De morir lèu

Nos mancaviam
Leis uelhs sarrats

Odor de tu
Aire vitau

Se siam quitats
Sens ren se dire
Coma se l'odor
De l'amor
Nos empachava
De viure